Казанлыларны ишегалдында уздырыла торган кышкы кичәгә чакыралар

Иртәгә, 30 гыйнварда, Татарстан урамында урнашкан 7 нче йорт ишегалдында «БиЮ» дип аталган ишегалды кичәсе үткәрелә. Чара «Күрше» фестивале ярдәмендә оештырыла.

Кунаклар өчен диджей-сетлар, күңел ачу чаралары, бушлай кайнар эчемлекләр станциясе һәм башка сюрпризлар әзерләнә. Кичә 18:00 сәгатьтә башлана.

Исегезгә төшерәбез, 31 гыйнвар көнне Казан Кремлендәге Гавами урыннар ишегалдында «Әбием сандыгы» спектакле күрсәтелә. Әлеге вакыйгада хәзерге заман кешесенең эш белән мәшгуль булып, якын кешеләрен онытуы турында бәян ителә. Моноспектакль 12:00 һәм 14:00 сәгатьләрдә башлана. Тамаша «Күрше» фестиваленең кышкы сезоны кысаларында оештырыла.